GHAZAL: 13th JUNE 2020

GHAZAL: 13^th JUNE 2020

Mujhe ab kisi ka sahara nahin hai

Wo darya hoon jis ka kinara nahin hai

Sada us ki bhi kan ma’n goonjti hai

Kabhi jis ne mujh ko pukara nahin hai

Tasawwur ma’n aati thi aawaz jis ki

Wo patthar kisi ne bhi mara nahin hai

Chalo us kharabe ma’n phir sar ko phore’n

Jahan ab ko’I bhi hamara nahin hai

Na ho ko’i apna sabhi ajnabi ho’n

Mujhe wo zamana gawara nahin hai

Mirey aasma’n par hai’n badal dhu’en ke

Wahan ko’I roshan sitara nahin hai

Kanwal chahtey ho jise tum wo dilbar

Kisi aur ka hai tumhara nahin hai.

GLOSSARY   

Sada: voice, sound.  Tasawwur: imagination. Kharabe: Ruined place. Gawara: Acceptable.

Dilbar: Loved one.

13^th JUNE 2020                       DR.G.R.KANWAL